भारत र कांग्रेसबीच अघोषित कार्यगत एकता ?

देश बाहिरबाट नाकाबन्दी गरेर भारतले नेपालको घाँटी अँठ्याइरहेको छ । अनि देशभित्र संसद चल्न नदिएर कांग्रेसले सरकारको घाँटी अँठ्याइरहेको छ । भूकम्पले थला परेको मुलुकको पुनर्निर्माण बेवारिसे छ । आठ महिना बित्न थाल्दा एउटा पुनर्निर्माण प्राधिकरण बन्न सकेको छैन । दाताले दिएको रकम अलपत्र परेको छ । लामो समयसम्म मधेसी दलले संसद् अवरुद्ध गरेका थिए । तर, मानवीय कारण देखाउँदै उनीहरुले पुनर्निर्माण विधेयक पारित गर्न सहमति जनाएपछि खास्टोले छोपेको बिरालोले म्याउँ गरेको छ । वास्तवमा मधेसी दलहरुलाई उचाल्नमा कांग्रेसको भूमिका रहेछ भन्ने प्राधिकरण विधेयक पारित हुन नदिनका लागि अहिले आफैँ अग्रमोर्चामा आएर उसले संसद् अवरुद्ध गरेबाट पुष्टि हुन्छ । 

अहिलेका घटनाक्रमहरुमा भारत र नेपाली कांग्रेसको अघोषित कार्यगत एकता देखिन्छ । आयतमा निर्भर अर्थतन्त्र ठप्प पारेर भारतले केही गर्न नदिने अनि संसदबाट विधेयक पारित गर्न नदिएर कांग्रेसले केही गर्न नदिने सहमति भएजस्तो देखिएको छ । सहमतिविपरीत प्रधानमन्त्रीको निर्वाचन लडेर रक्षात्मक भएको कांग्रेसलाई यसको मूल्य पनि सस्तो पर्ने छैन । कांग्रेसमा देशप्रति चिन्ता भएको तमाम नेता, कार्यकर्ता छन् । यसरी आरोप लगाउँदा उनीहको चित्त पक्कै पनि दुख्छ । तर, अहिलेको वास्तविकता यसभन्दा भिन्न छैन । ‘मलाई त्यही केटी चाहिन्छ’को शैलीमा कांग्रेसले मलाई प्राधिकरणको प्रमुख कार्यकारी गोविन्द पोखरेल नै चाहिन्छ भनेर अडान लिइरहेको छ । भइरहेको राष्ट्रपति, प्रधानमन्त्रीसमेत गुमाउन तयार कांग्रेस एउटा सीइओका लागि किन सती जान लागेको होला ? कांग्रेस बेलाबेलामा सबैलाई लोकतन्त्रको पाठ पठाउन खुब मन पराउँछ, लोकतन्त्रको प्रमाणपत्र आफैँबाट जारी हुनुपर्छ भन्ने मान्यता राख्छ ।

 अनि दुनियाँको कुन लोकतन्त्रमा सरकारी कार्यकारी पदमा प्रतिपक्षको मान्छे नियुक्त हुन्छ ? प्रतिपक्षले नीतिगत रुपमा कुरा उठाउन सक्छ, त्यसमा अवरोध गर्न सक्छ । तर, कुनै व्यक्तिका बारेमा यति चर्को अडान लिएर विधेयक नै पारित हुन दिन्न भन्दा उसलाई भन्दा देख्नेलाई नै लाज भइसकेको छ । कांग्रेसको अडान हेर्दा लाग्छ, प्राधिकरण ऐनमै यसको सिइओ सुशील कोइरालाका टाढाका नाता पर्ने, यसअघि योजना आयोगको उपाध्यक्ष भइसकेको, त्यसअघि बैकल्पिक ऊर्जाको कार्यकारी निर्देशक भइसकेको, प्यूठान जिल्ला निवासी पोखरेल थरको व्यक्ति हुनुपर्नेछ भनेर लेख्नुपर्छ । कांग्रेसमा प्रशस्तै बुद्धिजीवी छन्, देशप्रति चिन्ता भएका नेता छन् । पार्टीले यसरी हिलोमा मुख जोत्दा उनीहरु किन बोल्दैनन् ? के मुलुकको पुरानो पार्टी सुशील कोइराला नामक अयोग्य र कांग्रेसलाई बद्नाम गरेर विदा हुन लागेको बृद्ध मानिससँगै सकिन लागेको हो र ?

Labels: Political