तिर्सनाको वक्षस्थलमा चन्द्रसूर्यः सम्मान कि अपमान ?
भारतीय नाकाबन्दीको विरोध गर्न मोडेल तिर्सना बुढाथोकीले अनौठो शैली अपनाएकी छिन् । आफ्नो नग्न शरीरमा नेपालको राष्ट्रिय झण्डासहित नाकाबन्दीका बिम्ब पेन्ट गराएर उनले फोटो तथा भिडियो सुट गरिन् ।
अभिनेत्री करिश्मा मानन्धरको स्टुडियोमा गएर दुई हप्ताअघि उनले ‘न्यूड बडी पेन्ट’ गरी फोटो तथा भिडियो सुट गराएकी थिइन् । तीन तस्वीरहरु उनले आफ्नो सामाजिक सञ्जालमा पोष्ट गरेपछि तीव्र प्रतिक्रियाहरु पाइरहेकी छिन् ।
उनले चर्चामा आउनका लागि नयाँ हतकण्डा प्रयोग गरेको धेरैले ठानेका छन् ।
‘मैले चर्चामा आउनका लागि यस्तो गरेको होइन,’ तिर्सनाको स्पष्टीकरण छ, ‘चर्चामै आउन त न्यूड फोटोसुट नै गर्न सक्थेँ, यत्रो दुःख र पैसा लगानी गरे शरीरमा पेन्ट किन गर्थेँ ।’ राष्ट्रभक्तिबाट ओतप्रोत भएर आफूले यो काम गरेको उनले बारम्बार दोहोर्याइन् ।
वक्षस्थलमा चन्द्र र सूर्य अंकित गरिएकोमा धेरैले उनको आलोचना गरेका छन् । यसमा तिर्सनाको आफ्नै तर्क छ ।
‘मैले आफ्नो छातीमा चन्द्रसूर्य राखेकी हुँ, स्तनमा होइन,’ उनले कड्केर भनिन्, ‘केटाको छाती चैं छाती, केटीको छाती चैं स्तन मात्रै हो ? केटीको पनि हृदय त छातीमै हुन्छ नि । मैले चन्द्रसूर्यलाई आफ्नो हृदयमा सजाएर सम्मान गरेकी छु ।’
तिर्सनाले लगभग नग्न भएर बडी पेन्ट गरे पनि यसमा अश्लीलता नभएको उनको दाबी छ । ‘हो, मैले एक टुक्रा पनि कपडा लगाएकी छैन, तर, गोप्य अंगमा स्किन कलरको पदार्थ टाँसेर लाज ढाकेकी छु’ उनले भनिन् ।
वक्षस्थल चन्द्र र सूर्य तथा त्यसमुन्तिर पेटमा भारतको झण्डा सानो आकारमा छ । भारतको झण्डामुनि गोप्य अंगमा भोटेताल्चा छ भने त्यहाँमुनि तिघ्राहरुमा पेट्रोलका बोतल र ग्यासका सिलिण्डर छन् । पिँडुला र गोडामा दाउराबाट निस्केको आगोको लप्का देखाइएको छ । यो लप्का शरीरको पछाडिको भागमा पनि गएको छ ।
0 comments
Write Down Your Responses